മോണ്ടെറെ പാർക്ക്, അമേരിക്കൻ ഐക്യനാടുകളിലെ കാലിഫോർണിയ സംസ്ഥാനത്ത്, ലോസ് ആഞ്ചലസ് കൗണ്ടിയിൽ വടക്കൻ സാൻ ഗബ്രിയേൽ താഴ്വരയിലെ ഒരു പട്ടണമാണ്. ലോസ് ഏഞ്ചൽസ് നഗര കേന്ദ്രത്തിൽ നിന്ന് ഏകദേശം ഏഴ് മൈൽ ദൂരത്തിലാണിതു സ്ഥിതിചെയ്യുന്നത്. നഗരത്തിന്റെ ആപ്തവാക്യം "പ്രൈഡ് ഇൻ ദ പാസ്റ്റ്, ഫെയ്ത്ത് ഇൻ ദ ഫൂച്ചർ" എന്നതാണ്. ഏഷ്യൻ അമേരിക്കൻ വംശജരുടെ ഉയർന്ന വളർച്ചാനിരക്കുള്ളതും ക്ലസ്റ്റർ ഓഫ് സിറ്റീസ് എന്നറിയപ്പെടുന്നതുമായ നഗര വൃന്ദങ്ങളുടെ ഭാഗവുമാണ് മോണ്ടെറെ പാർക്ക്. 2010 ലെ യു.എസ്. സെൻസസ് പ്രകാരമുള്ള ഈ നഗരത്തിലെ ആകെ ജനസംഖ്യ 60,269 ആയിരുന്നു. മികച്ച വിദ്യാലയങ്ങൾ, വളരുന്ന സമ്പദ്വ്യവസ്ഥ, കേന്ദ്രീയമായ പട്ടണത്തിന്റെ സ്ഥാനം എന്നിവ കാരണമായി രാജ്യത്തെ മികച്ച ജീവിതസാഹചര്യമുള്ള സ്ഥലങ്ങളുടെ പട്ടികയിൽ മോണ്ടെറെ പാർക്ക് സ്ഥിരമായ ഇടം പിടിച്ചിട്ടുണ്ട്.